Buhari yayi Allah wadai da kisan Sheikh Goni Aisami

Shugaban Najeriya Muhammadu Buhari yayi Allah-wadai da abin da ya kira "kisan babu gaira-babu-dalili da aka yi wa Sheikh Goni Aisami" wanda ake tuhumar wani sojan Najeriya da kashe shi bayan da shaihin malamin ya ya rage masa hanya a motarsa, kamar yadda ƴan sanda suka tabbatar.

Marigayi Sheikh Goni Aisami

Yayin da yake mayar da martani kan lamarin, cikin wata sanarwa da kakakinsa Mallam Garba Shehu ya fitar, Shugaban ya ce "wannan mummunan kisan da sojan Najeriya yayi wa wannan mutumin kirkin da ya taimake shi ba hali ne da aka san sojojin kasar nan da shi ba, kuma ya yi hannun riga da horon da ak ba sojoji na nuna da'a da girmamawa da kare rayukan wadanda ba su aikata wani laifi ba."

Shugaba Buhari ya kara da cewa, "a matsayi na na babban kwamandan sojojin Najeriya, na fusata matuka kan wannan mummunan aikin da jami'in tsaro da aka horas domin ya kare rayuka ya aikata."

Ya kuma yi kira ga hukumomin sojin kasar "da su hukunta wadanda suka aikata wannan kazamin laifin ba tare da bata lokaci ba, sannan su yi waje da ire-iren qwadannan sojojin masu mummunan hali."

A karshe ya mika sakon ta'aziyya ga gwamnatin Jihar Yobe da jama'ar jihar da kuma iyalan Sheikh Goni Aisami.